Pro 9 | WSK | STEP | Ikia Nunguning ko kawam kaolam ale kawam te sokel tuokko ngatalek aora mu 7 kisiram ale bangaru ago namaram.

Proverbs 9

Ikia Nunguning aiwoso ko den

1 Ikia Nunguning ko kawam kaolam ale
kawam te sokel tuokko ngatalek aora mu 7 kisiram ale bangaru ago namaram.
2 Nu na ningo ningo nungam, ale yu waen gurugam, ale kuwim sor nungam burangaram mu awete awuram se aniso.
3 Se ko ura imet itiwik alo nunga maonam se namaman duruk dopang te kualala sanamaman ale aiwasan:
4 “Nina kariimet ninga ikia sinar mena alo, mu tairalko!
5 Tairal ale na yu ewere nalko!
6 Bagara ngualara sumu saparal ale ikia ago bagaralko!
Umutang te asele nina marak bagaralko!” ma balsan.

Kari ilagala, bo ikia ago se bo ikia mena

7 Ni kari numi patowara ale saki alo nunga gusia ko kari mu dogowa iluwa ko den manaru,
mu nu giris palaguk ka balu maguwurokko.
Ale kari memek bo dogowa iluwa ko den manaru,
mu nu giris palaguk ka morukko.
8 Buta se numi patowara ko kari mu ni dogowa iluwa ko den me manaruko!
Nu kerak kagerurukko!
Bare kari ikia nunguning ago mu due iluwa ko den manaru,
mu nu aking ni ko ko kueruk ale ka sinar taukko.
9 Kari ikia ago mu den manaru,
mu noko ikia eng nama yawarakala nunguningkiri ko aratukko.
Kari munan diram beteso mu ikia ningo kasuru, mu ni noko ikia ningo mu kunasi tusam.

10 Ni kari ikia ningo ago ko aratuko, mu ni KARI BIYA ko kuruwerko.
Noko munan ningo se diram nunguningkiri.
Buta se ni noko ninguru iki, mu ni kari sinar ago ko aratuko.
11 Ikia nunguning imitang ni lage ningo ka kausok se yar suen biya ali imi te bagerko.
12 Ni ikia ningo to, mu ikia nunguning umutang mel yawara yawara kisokko.
Bare ni gusiru ale biring tui, mu ni memek toko.

Ikia Ngualara aiwoso ko den

13 Ikia Ngualara mu imet bo dolara nguangara mena, kuring kapa kapa wonong karoso wore turan.
Nu ikia ningo nuam bo nukote mena, se nu munan ningo ko me ikiso.
14 Noko kawam wonong kusumuri aniso, se nu ko kawam songkuringi dagiso ale
15 kariimet nunga ura ilumonko nama taiwasan mu nunga aruso ale iwita nunga manarso:
16 “Nina kariimet ninga ikia sinar mena alo, mu aninga kawam te tairalko,” maso.
Ale kariimet ngualara sipira mu ago nunga aruso ale balso:
17 “Yu tere nasan mu yaman nuam! Yumusan ale na nasan gisan mu yaman nuam!” ma balso.
18 Bare kariimet noko kuring karo tusan, mu nuna kawam umutang kuera ko kawam ko iwita mu me ko ikisan.
Se kariimet noko kawam te giriman namaman, mu aitak kueman ale mutim ningi anisan. ^{▼▼Pro 9:18 Hebrew den te Sheol. Mu kari kuera nunga nuguwim.}